دجاج مشوي علي الفحم

دجاج مشوي على الفحم خاص للبر والكشتات

هذى الطريقه دجاج المشوي...تنفع حق الرحلات....

1- اول شي نغسل الدجاج عدل ونقطعه حسب الرغبة ونحطه في بادية نايلون او بلاستيك ( لان مثل ما انتوا عارفين انه مايصير نتبل اللحم او الدجاج في جدر معدن او استيل يقولون مو زين ولان البهارات تتفاعل مع المعادن ،، هذا اللي انا اعرفه )

2- نخلط البهارات مع بعض ( بصراحه انا سويت خلطة بروحي يعني حطيت لومي اسود - فلفل اسود - بهارات الدجاج وشوي ملح مع زيادة اللومي الاسود ،
بالاضافة الى تقطيع البصل ( وكل ما زاد البصل كان افضل ( بس عاد مو تحطون خيشة بصل كامله )

3- نبدي في دعك الدجاج مع البهارات المخلوطة والبصل ... وبعد ما نخلص نصب على جميع قطع الدجاج علبة لبن زبادي ونخليه في الثلاجة لفترة انت تقررها .. كل ما زاد كان احسن

4- وبعد هذا نفرش القصدير ونسوي القصدير 3 طبقات ( يعني 3 تحت و فوق )

5- نبدأ في وضع الدجاج على القصدير مثل ما شايفين بالصورة

6- بعد ما نخلص من وضع الدجاج ، نقطع شرائح من البصل والطماطم ونحطه على الدجاج ، ثم نقوم باغلاق القصدير بإحكام ودقة

7- بعد ما سكرنا القصدير ( طبعا نكون شابين الفحم ) نشيل القصدير ونحطة مباشرة على الفحم يعني لا تحطونه على الشبك ... حطوه مباشرة على الفحم ، بس ديروا بالكم على القصدير لا ينشق او تفتح فتحه ولو كانت صغيرة ، ولو حصل هذا ( مثل ما صار عندنا ) لان واحد من الشباب الله يهديه وهو قاعد يشيله جان ينشق القصدير شوي ، بس لا تحاتون لذا صار جذي حاولوا تسكرونه وتخلون القصدير على الفحم مده أطول ، يعني اذا ما كان مشقوق القصدير يبيله من 45 دقيقة ، واذا انشق القصدير يبيلة ساعه ، بالنسبة حقنا احنا خليناه ساعه تقريبا ، ولا تخافون اذا خليتوه اكثر عادي ما راح يحترق ....

8- بعد ما خلصت الساعة نشيله شوي شوي لانه حار وديروا بالكم ترى القصدير بسرعه ينشق

9- نبدأ بفتح القصدير

10- راح تشوفون مفاجأه ... تشوفون ان الدجاج ذايب حيل والطماطم فوقه والبصل
يعني شي عجيب..

بالعافية على قلووووبكم

» صور اجمل دجاج في العالم